altus sōl mediae noctis

2000-7-24 00:23MET 80mm f/4 ; 1/1000" 400ISO ; pol 44,84Kb 1846·1194

statuimus ut Longenniam, caput īnsulārum, rēctā uiā nāuigārēmus. crēdidimus Bentem Longenniae aduentum nostrum exspectāre ut nāuem cōnscendere posset. iam satis retardātī erāmus dum extrā Tintinnābulī Fretum nāuigāmus. rēuērā sinum est, sīcut Cornufretum, sed hoc nescīuērunt nāuigātōrēs quī prīmī hūc aduēnērunt et quī haec loca nominārunt. tandem Statiōnem Radiophōnicam Spitsbergēnsem attingere potuimus, Bentemque certiōrī factī sumus Longenniae esse.

dum Longenniam nāuigāmus, nihil nouī ēuentum est. nihilque nisi nebulam uīdimus inter Cornufretum et os Sinūs Glaciālis. illīc autem sōl fuit dum Bernardī oppidum praeternāuigāmus et usque ad aditum Longenniae.

hōrā trīcēsimā sextā post abitū ā Cornufretō Longenniam aduēnimus. grandō mixta niue cadēbat. nōbīs aduentīs duae fuērunt rēs agendae. prīmum bibendum ut aduentum nostrum celebrārēmus. deinde, quod longē antīquissimum fuit, balnea cum aquā calidā petenda. tandem somnum cēpimus et dormīre potuimus tam diū quam uoluimus. quanta fēlīcitās.

post merīdiem experrēctī sumus. diēs pulcherrimus fuit. sōl clārus in caelō quasi cyaneō, montēs fuluī et herbae prasinae in uallibus. duō diēs in oppidō mānsimus et cōpiās cibāriōrum, aquae ac liquōris Dīseliānī auximus. Bentem inuēnimus, et carnem phōcae ballaenaeque in quādam caupōnā ēdimus aduentum nostrum iterum celebrantēs. īnfēlīciter accidit ut KP et Bente uenēnō in morbum inciderint, at postrīdiē satis conualuērunt ad nāuigandum.

sine glaciē terrestrī est maxima pars terrae Longenniae circumiectae, praesertim terrae quae in merīdiem est. montāna est terra, sed nōn praecipuē pulchra. oppidum ipsum quasi oasis est cum omnibus commodīs nostrae aetātis similisque esset atque quodlibet oppidum in continente situm, si nōn essent tantī currūs niuāriī, sī cīuēs ursōs nōn ita timērent, sī oppidum ā peregrīnātōribus aetāte nōn inuāderētur. uidētur esse duae genera peregrīnātōrum. alterum ambulātōrum iuuenium rubrīs aut uiridibus uestibus expedītīs indūtōrum, alterum peregrīnōrum seniōrum quī tantibus uestibus indūtī sunt, ut crederēs illōs nōnnūllās noctēs in Antarcticō aequō polārī mānsūrōs esse.

nōbīs quidem summa caussa manendī fuit balnea. nōbīs recreātīs nihil fuit quod nōs in oppidō tenēre potuit, et igitur ab oppidō nāuigāuimus.