[domum] aestāte annī MMIII

dē sitū et natūrā īnsulārum Hauaiānārum

silua ūmida 2003-07-27 12:49HST 24mm ; f/8 ; 1/60" 100ISO ; pol maior dēserta 2003-07-29 11:18HST 24mm ; f/5,6 ; 1/125" 100ISO ; pol maior dēserta. 3581 metra suprā mare 2003-08-01 09:16HST 24mm ; f/4 ; 1/250" 100ISO ; pol maior dēiectus aquae in hortīs Akakanīs 2003-07-31 12:29HST 24mm ; f/8 ; 1/125" 400ISO maior Vallis Vaipïō 2003-08-03 11:51HST 24mm ; f/4 ; 1/250" 100ISO maior aestāte hūius annī iter fēcī in īnsulās Hauaiānās. diū dubitāueram quōmodo ōtium aestīuom agerem et quō proficīscerer, sed cāsū in tabernā librāriā quemdam librum dē īnsulīs Hauaiānīs uīdī. "illūcine eam?" paulisper meditātus sum. "quidnī eam" mihi ipsī mox respondī. dictum ac factum. paucīs post diēbus Honolūlī fuī, quae est urbs prīnceps īnsulārum. īnsulae in mediō Ōceanō Pācificō sitae sunt, haud procul ā circulō aequinoctiālī. igitur complūrēs sibi īnsulās fingunt frondentēs, fertilēs et fēcundās esse - quasi quemdam paradīsum. sed dīmidia ferē pars īnsulārum ē saxīs et dēsertīs cōnstat necnōn etiam igniuomīs montibus. terra ualdē differt. hīc sunt pluuissima mundī loca, hīc sunt dēserta et montēs, quōs nūbēs, pluuiae uel niuēs rārē attingunt. in īnsulā, quae magna īnsula Hauaiāna dīcitur, quasi omnis terra ē montibus cōnstat, etiam montibus igniuomīs. rē uērā hīc inuenitur omnium terrārum altissimus mōns ā rādice in fundō maris ad summum mēnsus. hic mōns Mauna Loa appellātur. summus mōns plūs quam quattuor mīlia metrōrum suprā aequor maris stat et plūs quam nouem mīlia suprā fundum maris!

dē lītoribus

Vaikīkī lītus 2003-07-25 13:43HST 24mm ; f/8 ; 1/60" 100ISO maior Vaikīkī lītus 2003-07-25 19:29HST 24mm ; f/2,8 ; 1/8" 100ISO maior Kailua - Kōna 2003-08-04 14:06HST 24mm ; f/5,6 ; 1/250" 100ISO ; pol maior quamquam lītus Hauaiānum plērumque saxōsum est, sunt etiam loca harēnōsa, sed pauca, quae etiam pūblica sunt. nihilō minus haec lītora harēnōsa ā peregrīnātōribus implentur tōtō annō. hīc in harēnā inter palmās ōtiō suō fruontur; praesertim ē Foederātīs Cīuitātibus Americae Septentriōnālis et ē Iaponiā adueniunt. lītus clārissimum illud est quod Vaikīkī uocātur. prope abest Honolūlō. lītora mihi placuērunt uidēlicet. sed etiam īnsulārum montēs mē uocāuērunt, dē quibus pauca loquar.

Mauna Kea

ut iam dīxī, īnsulae, quae sitae sunt in mediō Ōceanō Pācificō, amplissimō mundī, ē multīs montibus cōnstant; ē quibus duō tam magnī sunt ut summī suprā nūbēs surgere soleant tōtō annō, quibus nōmina sunt Mauna Loa et Mauna Kea. summīsque montibus caelum clārissimum est, nam dīmidia pars āeris, quō spīrāmus prope mare, in hāc altitūdine deest, et lūcēs urbium longē absunt. haec efficiunt ut locus sit aptissimus ad stellās contemplandās. hīc igitur inueniuntur, plēraque in summā Maunā Keā, mundī maxima obseruātōria uel speculae astronomicae. Mauna Kea satis facilē ascenditur, sed inopia āeris efficiēbat ut in superiōrī parte montis nōn possem celeriter īre quīn omnīnō exanimārer, et summus mōns admodum uentōsus ac frīgidus est. eō locō latet sub solō glaciēs perennis. tamen operae pretium est ascendere. nōn dubium est quīn caelum stellātum uidēre hōc locō magnificum est. ibī etiam subtīlissimae partēs Viae Lacteae nūdīs oculīs facilē contemplārī possunt. Via Lactea 2003-07-29 20:30HST 24mm ; f/2,8 ; 60" 400ISO maior media pars Viae Lacteae 2003-07-29 21:32HST 80mm ; f/1,3 ; 16" 400ISO maior summa Mauna Kea, 4205 metra suprā mare 2003-08-01 14:03HST 24mm ; f/5,6 ; 1/125" 100ISO ; pol maior

dabam 11. Aprīlis 2004.

Steinar Midtskogen